दक्षं प्रजापतिं स्वस्थमश्विनौ वाक्यमूचतुः |
कुतो हरीतकी जाता तस्यास्तु कति जातयः ||१||
रसाः कति समाख्याताः कति चोपरसाः स्मृताः |
नामानि कति चोक्तानि किं वा तासां च लक्षणम् ||२||
के च वर्णा गुणाः के च का च कुत्र प्रयुज्यते |
केन द्रव्येण संयुक्ता कांश्च रोगान्व्यपोहति ||३||
प्रश्नमेतद्यथा पृष्टं भगवन्वक्तुमर्हसि |
अश्विनीर्वचनं श्रुत्वा दक्षो वचनमब्रवीत् ||४||
पपात बिन्दुर्मेदिन्यां शक्रस्य पिबतोऽमृतम् |
ततो दिव्यात्समुत्पन्ना सप्तजातिर्हरीतकी ||५||

हरीतक्यभया पथ्या कायस्था पूतनाऽमृता |
हैमवत्यव्यथा चापि चेतकी श्रेयसी शिवा |
वयस्था विजया चापि जीवन्ती रोहिणीति च ||६||

हरीतक्याभया पथ्या प्रपथ्या पूतनाऽमृता |
जयाऽव्यथा हैमवती वयःस्था चेतकी शिवा ||२३३||
प्राणदा नन्दिनी चैव रोहिणी विजया च सा |
कषायाऽम्ला च कटुका तिक्ता मधुरसान्विता |
इति पञ्चरसा पथ्या लवणेन विवर्जिता ||२३४||
अम्लभावाज्जयेद्वातं पित्तं मधुरतिक्तकात् |
कफं रूक्षकषायत्वात्त्रिदोषघ्नी ततोऽभया ||२३५||
प्रपथ्या लेखनी लघ्वी मेध्या चक्षुर्हिता सदा |
मेहकुष्ठव्रणच्छर्दिशोफवातास्रकृच्छ्रजित् ||२३६||
वातानुलोमनी हृद्या सेन्द्रियाणां प्रसादनी |
सन्तर्पणकृतान्रोगान्प्रायो हन्ति हरीतकी ||२३७||
तृष्णायां मुखशोषे च हनुस्तम्भे गलग्रहे |
नवज्वरे तथा क्षीणे गर्भिण्यां न प्रशस्यते ||२३८||
हरस्य भवने जाता हरीता च स्वभावतः |
सर्वरोगांश्च च हरते तेन ख्याता हरीतकी ||२३९||

हरस्य भवने जाता हरिता च स्वभावतः |
हारयेत्सर्वरोगाञ्च तेन प्रोक्ता हरीतकी ||८||
जीवन्ती पूतना पश्चादमृता विजयाऽभया |
रोहिणी चेतकी सप्त भेदभिन्ना हरीतकी ||९||
जीवन्ती जीवनोद्योगात्पावनात्पूतना मता |
सुधावदमृता ज्ञेया विजया विजयप्रदा ||१०||
नृणामभयदा यस्मादभया तत् प्रकीर्तिता |
रोहिणी तु गुणारोहाच्चेतनाच्चेतकी मता ||११||
जीवन्ती स्वर्णवर्णाभा पूतनाऽस्थिमती मता |
अमृता त्रिदला प्रोक्ता विजया तुम्बरूपिणी ||१२||
पञ्चाङ्गी त्वभया ज्ञेयाऽमृता वृत्ता तु रोहिणी |
त्र्यङ्गी तु चेतकी ज्ञेया कर्म तासामथोच्यते ||१३||
सर्वरोगेषु जीवन्ती प्रलेपे पूतना हिता |
शुद्ध्यर्थममृता प्रोक्ता विजया सर्वरोगहृत् ||१४||
अक्षिरोगेऽभया शस्ता रोहिणी व्रणरोहिणी |
चेतकी चूर्णयोगे स्यात्सप्तधैव प्रकीर्तिता ||१५||
नवा स्निग्धा घना वृत्ता गुर्वी क्षिप्ता च याऽम्भसि |
निमज्जेत्सा प्रशस्ता स्याद्रोगध्न्यतिगुणप्रदा ||१६||
शोणा च्छिन्ना गुडनिभा किञ्चिदल्पा कषायिणी |
स्थूलत्वक् सरसा स्वल्पबीजा गुर्वी हरीतकी ||१७||
चर्विता वर्धयत्यग्निं पेषिता मलशोधिनी |
स्विन्ना सङ्ग्राहिणी प्रोक्ता भृष्टा पथ्यान्नदोषनुत् ||१८||
ग्रीष्मे तुल्यगुडां सुसैन्धवयुतां मेघावृते ह्यम्बरे तुल्यां शर्करया शरद्यमलया शुण्ठ्या तुषारागमे |
पिप्पल्या शिशिरे वसन्तसमये क्षौद्रेण संयोजितां राजन् प्राप्य हरीतकीमिव रुजो नश्यन्तु ते शत्रवः ||१९||
हरीतकीनामगुण-
शिवा हरीतकी पथ्या चेतकी विजया जया |
प्रपथ्या प्रथमाऽमोघा कायस्था प्राणदाऽमृता ||२०||
जीवनीया हेमवती पूतना वृतनाऽभया |
वयस्था नन्दिनी ज्ञेया श्रेयसी रोहिणी तथा ||२१||
हरीतकी पञ्चरसाऽलवणा तुवरोत्कटा |
रूक्षोष्णा दीपनी मेध्या स्वादुपाका रसायनी ||२२||
सरा बुद्धिप्रदायुख्या चक्षुष्या बृंहणी लघुः |
श्वासकासप्रमेहार्शः कुष्ठशोफोदरान् कृमीन् ||२३||
वैस्वर्यग्रहणीदोषविबन्धविषमज्वरान् |
गुल्माध्मानव्रणच्छर्दिहिध्माकण्डूहृदामयान् |
कामलां शूलमानाहं प्लीहानं चापकर्षति ||२४||
मधुराम्लतया वातं कषायस्वादुभावतः |
पित्तं हन्ति कफं हन्ति कटुत्वेन हरीतकी ||२५||

हरीतक्यभया पथ्या प्रपथ्या हैमवत्यपि ||२२१||
कायस्था श्रेयसी ज्ञेया प्राणदा विजया शिवा |
जया विलवणा पञ्चरसानु तुवरोत्करा ||२२२||
स्वादुपाकरसायुष्या रूक्षोष्णा बृंहणी लघुः |
दीपनी पाचनी मेध्या वयसःस्थापनी परम् ||२२३||
रसायनी च चक्षुष्या बलबुद्धिस्मृतिप्रदा |
कुष्ठवैवर्ण्यवैस्वर्यपुराणविषमज्वरान् ||२२४||
शिरोऽक्षिपाण्डुहृद्रोगकामलाग्रहणीगदान् |
सशोषशोफातीसारमेहमोहवमिकृमीन् ||२२५||
श्वासकासप्रसेकार्शःप्लीहानाहगदोदरान् |
विबन्धं स्रोतसां गुल्ममूरुस्तम्भमरोचकम् ||२२६||
हिध्माध्मानव्रणान् शूलं त्रीन् दोषांश्च व्यपोहति |
स्वाद्वम्लभावात्पवनं कटुतिक्ततया कफम् ||२२७||
कषायमधुसत्त्वाच्च पित्तं हन्ति हरीतकी |
मज्जवक्स्नायुमांसास्थिस्थिताः पञ्चाभयोद्भवाः ||२२८||
स्वादुकट्वम्लतिक्ताख्यकषायाः क्रमशो रसाः |
पथ्यामज्जा च चक्षुष्यो वातपित्तहरो गुरुः ||२२९||
नीरजा वनजा चैव पर्वतीया इति त्रिधा |
यथोतरं पथ्यतमा विज्ञेया त्रिविधाभया ||२३०||
कालयोगात्स्वयं पक्वा पतिता च महीतले |
नवा स्निधायता वृत्ता गुर्वी क्षिप्ता तथाम्भसि ||२३१||
निमज्जेद्या तथैकस्मिन् फले स्याच्च द्विकर्षता |
सर्वदा गुणकृत्सा तु ततोऽन्या तु विवर्जिता ||२३२||
नवादिगुणयुक्तत्वं तथैकत्वं द्विकर्षता |
हरीतक्याः फले यत्र तत्सर्वं गुणकृद् भवेत् ||१३३||
जन्तुजग्धा दवादग्धां जले पङ्के स्थितां पुनः |
ऊषरे च स्थितां भिन्नां वर्जयेत्तु हरीतकीम् ||२३४||